رواية لو كنت اعرف الفصل العاشر بقلم ميمي عوالي

عيونك وانتى بتسمعى منى الكلام ده لاول مرة انا آسف ان اعترافئ ده اتاخر السنين دى كلها . بس صدقينى هفضل طول عمرى اجلد ذاتى بسبب الغلطة دى 
هقولهالك تانى واتمنى انك ماتحكميش عليا انها تبقى اخر مرة اقولها لو رفضتى طلبى . بحبك يا ايمان بحبك فوق الحب .. حب
الفيديو اللى كان على الفلاشة خلص وايمان تعبيرات وشها زى ماهى بس زاد عليها دموع كتيرة اوى مابتقفش رمت نفسها على السرير وهى ضامة روحها بايديها زى الجنين وفضلت ټعيط وهى بتردد بينها وبين نفسها لو كنت اعرف كنت استنيتك . حتى لو كنت استنيتك العمر كله 

..
تانى يوم ايمان اخدت معاها الفلوس وصاحب الفيلا راحلها اخدهم منها وشكرها جدا وهو بيمدح فى اخلاق يوسف وان كلمته سيف و دعى لهم ان ربنا مايحرمهمش من بعض
كانت مستغربة الدعوة لكن حست انها فرحانة بيها ولقت روحها بتأمن عليها بكل صدق 
عدى خمس ايام على سفر يوسف من غير مايتصل بيها ولا مرة رغم انها عرفت من ايمان الصغيرة انه بيكلمها كل يوم ويتطمن عليهم كلهم 
كانت كل يوم قبل ماتنام تشغل الفلاشة وتتفرج على الفيديو وهى بتسمع كلام 
يوسف وبتفكر فيه ومابقيتش عارفة المفروض لما يرجع ترد عليه تقول له ايه
كلامه ليها رجع لها كل مشاعرها ليه بتاعة زمان اعترفت بينها وبين نفسها ان هى كمان كانت بتحبه .. بتحبه اوى كمان وكانت حاسة بحبه ليها ما هو اصل الحب مابيستخباش كانت عينيه ونظراته وافعاله وتصرفاته كل حاجة كانت بتقوللها انه بيحبها وهى كمان كانت بترد بكل حاجة تقول ان هى كمان بتحبه من غير ماحد فيهم ينطق بالكلمة الصريحة للحب يوم ماسافر كانت مقهوره من انه هيبعد عنها لاول مرة فى حياتها قلبها كان ۏاجعها على فراقه لكن كانت بتحاول تلملم ۏجعها عشان عمتها واللى حواليها لكن قراره بانه مايرجعش مصر تانى بعد مۏت عمتها صابها فى مقټل ايامها هى كمان قفلت على نفسها من الحزن والكل كان معتقد ان حزنها على مۏت عمتها ماحدش ابدا قدر يعرف السبب الحقيقى لاعتزالها ده غيرها هى وبس واعتقدت انها كانت واهمه نفسها بحبه ليها وقالت لروحها ماهو لو كان بيحبك فعلا زى ما انتى فاهمة كان اكيد هيرجع عشانك 
لكن زى ماهو طلع من قمقمه وډفن نفسه فى الشغل هى كمان طلعت ودفنت نفسها فى دراستها ومذاكرتها اللى ساعدتها انها تجيب الامتياز وتتعين فى البنك وسنة ورا التانية اجبرت نفسها تحط يوسف وذكرياته فى صندوق وتخبيه فى حتة بعيدة اوى فى قلبها وعقلها وقررت تدى لنفسها فرصة انها تعيش لما شافت اصرار سليم عليها وكان اللى كان 
كانت كل يوم ترجع نفس شريط الذكريات وهى بتلوم فى يوسف من جواها ان بعاده هو السبب فى كل اللى كان
وكان يوم الخميس معاد امنية مع سليم ايمان الكبيرة فى اليوم ده قررت تاخده اجازة واتفقت مع ايمان الصغيرة انهم هيروحوا يقضوه فى النادى اول ما امنية تنزل لباباها وقالت لمصطفى وفاطمة عشان يروحولهم يتغدوا معاهم
وكمان كانت متفقة مع محمود انها هتعدى عليه فى المكتبة على الساعة اتناشر و ده المعاد اللى بتعدى عليه الست اللى عاوز يتجوزها محمود طلب منها انها تشوفها بس وتتكلم معاها عادى وتقول له انطباعها عنها
امنية نزلت لسليم وسلمت عليه كالعادة وهو طلع بالعربية وقاللها ها يا مونى .. احكيلى عاملة ايه مع صاحبتك الجديدة 
امنية الحمدلله يا بابا كله تمام
سليم لسه برضة قاعدة عندكم
امنية ااه يا بابا وكمان باباها هيقدملها فى المدرسة بتاعتى
سليم وباباها بقى بيجيلها يزورها عندكم
امنية لا يا بابا هو جه عندنا مرة واحدة بس مع جدو وبعدين هو اصلا مسافر اليومين دول ولسه ما رجعش
سليم يعنى انتى خرجتى وسيبتى صاحبتك لوحدها 
امنية لا ماهى ماما النهاردة واخدة اجازة وهتاخد ايمو ويروحوا النادى وهيتغدوا هناك مع جدو وتيتا 
سليم سكت شوية وبعدين قاللها طب ايه رأيك تحبى تتغدى معاهم واللا نتغدى لوحدنا
امنية باستغراب تقصد تودينى النادى وتسيبنى زى المرة اللى فاتت
سليم لا .. اقصد اننا نتغدى كلنا سوا
امنية بقلق من رد فعل مامتها وجدها مش عارفة يا